قارا یازی

یازیرام قوشوقلاری ایتیرم من یازیلاردا

بوغولور مین سارایین گؤزلری چایدا

گؤزگولر سیندیریلیر دیل كسیلیر

اولویور قوردسایاق بیر دلی‌آیدا

سئوگیدنده یازیرام سئوگی چؤكور

اؤلولر بیربیرینین قانلی دوداقلارین اؤپور

تانری، شیطان و آدام اوچلوكده

حووا آدلی قادینی ساتین بؤلور

یازانین سون نفسیینده اؤلولر بیرده اؤلور

غوربت ائلده دیری‌لر بیر بیر اؤلور

صمدین قولتوغو آستیندا دیلیم

یولونو دوز گئدیر آنجاق دیری دؤنمور

آدی باتمیش بیر ائلی یازدا یازیر

اؤلولر باسدیریلیر دیریه قبیر قازیر

سوروشور، سؤیله‌نیلیر، هاممی دییر

یازانین ندن بئله قارا یازیر!؟

آچار سؤزلر : یازی,

گؤنده ر     بؤلوم لر: قوشوق (شعر)