گئرچك و خایال؛ سینیرلار قیریلیر

دمیر قایچی‌نی خیژم‌ایله (بَرك) آلینه آلدی. باش‌بارماغینی بیر گؤزونه؛ قالان بارماغلارینی قایچی‌نین بؤیوك گؤزونه سوخموشدور. بیر ائده‌رمن (قهرمان- ایگید) كیمی سانیریدی اؤزونو. شالوار و شورتونو آشاغیا چكدی و توالت‌ده آیاق اوسته دایاندی. قایچی‌نین آغزینی آچدی و اونو گؤبه‌گینین آستینداكی (آلتینداكی) یئك (شیطان) آلَتینه گؤسته‌ردی. بو ایشه سون وئرمك ایسته‌ییردی.

بوسبوتون اولایلاری خاطیرلاییردی. 5 یاشیندا چیلله گئجه‌سینده؛ بیر سوپا (سیپا) ائششه‌یی یوخودا گؤردو. سوپانین قارینینین آستیندا، اوزون و قارا بیر شیء آسلانمیشیدی و اونون ایچیندن ائشی‌یه سو سپیلیردی. قارا ائششك، اونا دئمیشدی كی: "سنده لولوشونو چیخارت قار- بوزلاری اَریت." آنجاق او بو ایشی گؤرندن سونرا؛ دان‌ سؤكولمه‌دن قیچلارین آراسینین گؤینه‌مه‌یی‌‌ایله؛ یوخودان هاپپیلمیشیدی و دوشونموشدو، دوممولو‌دوز دؤشه‌یین اؤزه‌ییه (مركزینه)‌  گؤل‌له‌ییبدیر.

ائله او گئجه‌دن بری ایش‌ یاوالاشدی. هر گئجه یوخونون دوز شیرین یئرینده؛ ائششك، قار، سو و گؤل. هردن بیردن، ائششك یوخودا او قدر ایشییردی كی بو طرف ده سویون چوخونلوغوندان بورولغان (گرداب) یارانیردی.

آنا و قونشونون آروادلارینین فیكیر فابریكالاری یولا دوشموشدور. هر نه دوعا، درمان، اویون مویون بیلیردیلر اسیرگه‌مه‌دیلر؛ آنجاق سوپا، ائششك اولدو و قری‌ییب قوجالدی و سیدیكلر گئجه‌دن گئجه‌یه چوخالدی. ایندی اوغلان 13 یاشی اولوب و "جاواد گؤل‌له" آدیلا تانینیر.

یئنه خاطیرلادیری او گونو كی اووسونچو (دوعا یازان – جین دوتان) كنده گلمیشیدی و آناسی اونلا قونویو آرایا قویموشدور: " اووسونجو قارداش! بیلمیرم بو اوغلانین ایچینده نه قدر سو وار؛ هر بیر یول كی یئرینه ایشه‌ییر ائله‌بیل كی بیر دولچا سو سپیب‌سن!؟" اووسونجو اونا اوشاغین سیدیكیندن اؤزونه ایچیردین بویوروق وئرمیشدی! هر حال ایشه‌مه‌یین آجیمتیق (نسبتا تلخ) دادینی‌دا دادمیشدیر؛ آنجاق بو یولدا بوشا چیخدی.

خاطیرلاییری بو اولومسوز (منفی) اولایلار اونو برك آبیرسیز ائدیبدیر. اوزاق و یاخین كندلرده؛ اونو تانییردیلار و هامی اونو بارماغلاریلا بیری‌بیرینه گؤسته‌ریب، لاغ (بای- استهزاء) ائدیردی. او اوركه‌ن (همیشه) دولوخسانیردی و دوداخلاری بؤزولوردو. كیمسه اونلا اوركداشلیق ائتمیردی و او گئت‌گئده سینیردی.

خاطیرلاییری بیر گئجه گؤل‌لویندن سونرا دؤشه‌یه آغنامیشدی (اَووه‌ده‌مه‌ك) و بو ایش اونو قوروتماماغینا گؤره؛ یاواشجاسینا اوتاغین اورتاسیندا نفت‌ایله یانان چراغا یاخین اولموشدور و شالوار- كؤینه‌یین قوروتماغا گؤره قارنینی چیراغا یاپیشدیرمیشدی و ایندی‌ده او یانماغین یئری؛ قارنیندا قالیر.

ایندی 18 یاشیندا ایگید اوغلان اولوبدور؛ آنجاق هله‌ده یئرینه ایشه‌ییر. گه‌ییشمه‌لَرده (مصلحت‌لر) یارارسیز اولوب و او اؤزونو بوُرماق (اَخته ائیله‌مك) قرارینا گلیبدیر. قایچی اَلینده و نیفرتله داششاغینا باخیر. قایچی‌نین آغزینی یومور و قیشقیریر. " اؤلوم اولسون ائششه‌یه "

آردی وار- ادامه مطلب


گؤنده ر     بؤلوم لر: ساتاشما