سئوگی و بیز

قات - قات سیرا چؤكموش سئوگی پاسینی اورییمده داشییرام. ایللر ساییسینا اؤلچسم‌سه، آز چاغلار دوزن‌له‌نیر. 8 ایل ، 10 ایل، ایگیرمی ایل. دوشونورم و دوشونوروك سئوگی ایللر سایغاجینا سیغماز اولوب. بو سئوگی گؤبلك كیمی بیتدی آنجاق یاشاییشیما درین بیر كؤك سالدی. نووروز گولو كیمی بیتدی، سولدو چیچكلری آنجاق جانیمین ایچینی آلدی.

تانری چؤرتكه سینده 21 یاشیندا ساییلیردیم؛ سئوگی بولوتلاری اؤرگیمین گؤیونه یاییلدی. شاخدی، گورولدادی و باهار یاغیشینی سوسوز دامارلاریما سپدی. نئجه قدحلره ییغمیایدیم سئوگی ایچگی‌سینی. ایندی 12 ایللیك شارابیم وار. باخماغی جانلارا ساغلامدی؛ ایچمه‌یی گؤر نئینر؟!

سئوگینی منده یارادان؛ چوخ تئز آیریلیق ماهنی‌سینی چالدی. آنجاق هله‌ده زیلی و بمی ایله اوینویورام. ایندی من یاپ – یالقیز او سئوگی‌نین ییه‌سییم.

ناخیشلی ایپك دسمال ایله پاسلی سئوگیمی سیلركن؛ هله‌ده پاریلتیسی وار. زامان دورور او زامان. سئوگی‌نی دوشوننده  اونو آنلاماغا چالیشاندا؛ ایناناراق سانیرام عوموردن ساییلمیر بو آنلار.

سئوگی بیر پایلاشیم اولسادا، اینسانلارین ایچ قابینا باخاراق برابر آلینمیر. بیرینه چوخ یئتیشیر بیرینه ایسه آز. دوغروسو بودور سئوگی‌ده عدالت یوخدور. هابئله گؤزللیگی‌ده بو عدالت سیزلیكده‌دیر.

سئوگی ایكی اوزلو دمیر پولا بنزر. بیر اوزو دالغادیر، جوشغودور، دئپرمدیر، گؤز یاشی و اوچوروم. او بیری ایسه ساكین، درین، اوچوش، یئنه‌ده گؤزیاشی بئله‌لیكله بونلارین توپلومو یاشاماق فلسفه‌سینی یازدیریر.

سئوگی! تانری بویو یاشاماقدادیر. اونا هاردان باشلادین‌می و هاردا قورتاراجاخسان‌می؟ سورویو وئرمك اولمور.

سئوگی‌یه یوخاریدان باخ. یئردن باخان سئوگی‌لر یئر قوخوسو وئریر. ایرنج، كیفسه‌میش و بول‌سئكسووال.

من درین باخیشلارا ساپلانماغی، یئر-گؤی آراسیندا ساللانماغی؛ ایشیم‌ایشغلارا آسلانماغی دویموشام. ایچ ائدیب قوسمامیشام. قایتارمامیشام بو یئكه تیكه‌نی. اوتغونا - اوتغونا اوتوزموشام. سوندا سیندیریب سازالمیشام.

آردی وار- ادامه مطلب
آچار سؤزلر : سئوگی,

گؤنده ر     بؤلوم لر: توپلومسال (اجتماعی)