سئچیلیمیش: گؤی اوزو داش ساخلاماز پیتیكدن – اردشیر روستمی و زهرا قیطرانی

 ************************************

چیچك‌لر دوغولور بو یاز گئجه‌سی

چیچك‌لر دوغولور بو یاز گئجه‌سی

بو یاز گئجه‌سینده سئومه‌یه نه وار؟!

درسم گول‌لرینی بو گلن یازین

ساللانیب یئلله‌نسم بوداق‌لاریندان

ائشیتسم آدیمی سئون بیر قیزین

هله اؤپولمه‌میش دوداق‌لاریندان

بو یاز گئجه‌سینده اؤلمه‌یه نه وار؟!

... چیچك‌لر دوغولور بو یاز گئجه‌سی

اوزاق خسته‌خانا اوتاق‌لاریندا

باشینی دیبچكدن اوزادیب باخیر

یاتان خسته‌لرین هر بیریسینه

هله قورخاق عطری اوتانجاق عطری

قاریشیر اوتاغین یاد اییی‌سینه

درمان اییی‌سینه یود اییی‌سینه

چیچكلر دوغولور بو یاز گئجه‌سی

چیچكلر آچیلیر گولـله سسینه

گولـله آچیلیر

آغ – آغ كؤینك‌لرین یاخالیغیندا

ساغ – سول اورك‌لرین یاخین‌لیغیندا

گولـلر آچیلیر

گولـله‌لر آچیلیر ، گول‌لر آچیلیر

چیچك‌لر آچیلیر بو یاز گئجه‌سی ...

چیچك‌لر دوغولور بو یاز گئجه‌سی

پاریس‌ده

تبریزده

حَیه‌طیمیزده

بو یاز گئجه‌سینده چیچك‌له‌یه‌جك

بلكه دردیمیزده حسرتیمیزده

چیخاجاق یول‌لارا چیچكلی قیزلار

نه باخماغا گوج وار نه گؤز یومماغا

نه چیچك وئرمه‌یه بیر كسیمیز وار

نه بیر كیمسه‌میز وار چیچك‌ اومماغا ...

... درسم گول‌لرینی بو گلن یازین

ساللانیب یئلله‌نسم بوداق‌لاریندان

ائشیتسم آدیمی سئون بیر قیزین

هله اؤپولمه‌میش دوداق‌لاریندان

بو یاز گئجه‌سینده

اؤلمه‌یه نه وار؟!

گؤنده ر     بؤلوم لر: قوشوق (شعر)