«  آدیم سازدیر»

اوزاق- اوزاق دؤورانلاردان

ائلچی گلن ائللی سازام

اوزون – اوزون كروانلاردان

دستان آچان تئللی سازام

"شامان" لارین سینه‌سینده.

زامان زامان جیلالانیب "قوپوز" آدلی آدلانمیشام

ائل اوبانی گزه‌گزه بارلانمیشام ، دادلانمیشام.

چالینمیشام توی – دویونده

                 یای‌دا، قیش‌دا

سكگیز مین ایللیك آبیده‌م اوزه چیخیب "جیغامیش" دا.

" باخشی"

" وارساق"

" اوزان" لارلا یاشا دولوب

                                 بوی آتمیشام

"ده ده قورقود" قوجاغیندا تئللریمی آغارتمیشام

اوخشامیشام كؤنوللری

مدنیت اوجاغیندا تئلیم اوسته تئللر گلیب

           گون دوغاندان،  گون باتاندان

گؤروشومه ائللر گلیب.

" آشیق دیلقم"، " تئللی" سینی تاپیشیریبدیر تئللریمه

" آشیق غریب" اوره‌ك سؤزون منله دئییب ائللریمه

" توفارقانلی" میضراب‌ایله آلیب مندن " گولگز" سَسین

اوخوموشام "قوربانی" نین بوینو بوكوك بنؤوشه سین.

چوخ زامانلار گؤزلریمدن داملا داملا داملاییب قان

چوخ زامانلار یانا یانا

یانیب منه آزربایجان.

عؤمور بویو ، اولدوز سایی

چوخلو یولداش قازانمیشام

شكی ، شیروان

نخجووانا من قول آتیب اوزانمیشام

نئچه نئچه یولداشیم وار

گنجه ، باكی

                     ایستانبول‌دا

هاوالاریم پرده پرده

چئشیدلیدیر هر ماحالدا

بیر قارداشیم كوردوستاندا

بیری اولوب چنلی بئللی

بیری قالیب توركمنده

من اولموشام اورمو ائللی.

اوزون كروان ائلچیسی‌یم ، طایفام، ائلیم واردیر منیم

بیر جوت "خره‌ك" آراسیندا

دوققوز تئلیم واردیر منیم

              تئلیم پولاد

                                  میضراب گیلاس

سیررین دئییم سن قولاق آس!

ایستی –  سویوق هاوالاردا، اؤزون پوزماز بئله میضراب.

قابیل آشیق بارماغیندا آزار وئرمز تئله میضراب.

هر دن كوله‌ك، هر دن سویام

گاه گؤروسن، اوددانام من

قایریلمیشام اوچ حیصصه‌دن

آغاج دانام، توت‌دانام من.

"چاناغیم" بوش دوققوز تیكه

" اوستو" اوچ دور؛ "آلتی" آلتی

سئویشیبلر " داغ" یئرینده "قول" گلمه‌میش، قاش گؤز آلتی

قولوم اوزون بندی بندی

"بوغاز"یمدا اولوب اینجه

" اوستا داداش" دینجلمه‌ییب، "داراغیما" تئل گلینجه

ساز اولوبان آشیق دوستوم سینه‌سینه آلیب منی

میضراب چكیب تئللریمه، نارین نارین چالیب منی.

آشیق دئییر:

                             تئللریمین اوچو " زیل" دیر

                                      دؤردو " بم" دیر

ایكی تئلیم "آنا" آدلی

اوغلو، قیزی بیر عالمدیر

زیل تئللریم بارماق آلتی

آشیق دیلی " قیز" دئییلیر

قیزلار گلین اؤپور اَلین.

دستانلاریم هاوا هاوا قانادلانیب هر شهرده

    پرده‌م اوسته پرده گلیب

                        من اولموشام اون دؤرد پرده

ایكی پرده‌م "شاه‌پرده" دیر

هاوالارین باش پرده‌سی

ماهنیلاری گؤزل‌له‌ین

               گؤزله كیپریك

                               قاش پرده‌سی

بیری شانلی " كوراوغلو" دور

بیری گؤزل " گؤزل‌له‌مه."

بیر پرده‌مین آدی "دیوان" ؛ بیریسی‌نین آدی "لال" دیر

دؤرد پرده‌مین آدی " بوغاز" كؤكلنمه‌سه، سه‌سیم كالدیر

آشیق دیلی

" یئتگین‌لییی بیللندیرن

                       هاوالاری گوللندیرن."

پرده‌لریم دوزوم دوزوم دونیالاری گؤرسه‌دندیر

"باغلاما" سی، یای چیریشی

باغیرساق دیر

                  "چیلله" دندیر

شیرین سؤزلو تئللی سازام

"تجنیسم" وار ؛  "گرایلیم" وار

" گؤیجه گولو" ، "كشیش اوغلو"

دؤرد بم تئلیم بزه‌نمه‌میش – دوزه‌نمه‌میش اولور " گلین"

قاری تئللر دونیا گؤرموش

"دوراخانی" ؛  " ایمراهیم" وار.

" اوستا ایشو " 

" اوستا یئپریم" منه بؤیوك آد وئریبلر

" آشیق فرهاد" میضرابلاری، ائل آغزیندا داد وئریبلر

منله گزیب اؤلكه‌لری " آشیق وئیصل"

       " آشیق پاشا"

ائل آشیغی " اصلان بابا" عؤمرون منله سوروب قوشا.

" اصلی كرم " دستانینی من یازمیشام تئلدن تئله

قاتار قاتار شرقی چالیب آپارمیشام ائلدن ائله

سیزلامیشام "قوربتی" دن

اوخوموشام "كَسمه كرم"

آشیق قریب قوجاغیندا من اولموشام بیر " شاه صنم".

                                      تئللی سازام

اوزون قولدا دوزولوبدور دوققوز قولاغ

هر بیریسی بیر تئل چكیب

كؤكسوم اولوب بولاق بولاق

" آشیغ" لاریم آغاجدانسا

           تئلیم گوموش

                                 پولادداندیر

سان كی هر تئل ؛ تئل تئل اولموش

آلوولانان بیر اودداندیر

دستانلاردان دستانلارا قاپی آچان یوللاریم وار

یاخشی پیسی آراماغا آختاریشلی قوللاریم وار

دئیه‌سن كی هر تئلیمده جوشوب داشان قان دولانیر

                  یا پرده‌لر آراسیندان

                                 چاتماقاش جانان بویلانیر

سان‌كی منیم سینمده‌ده؛ بیر چیرپینان اوره‌ییم وار

اوره‌ییمده لای لای یاتان، قایغیم، دویغوم، دیله‌ییم وار

یوخسا !

ندن تئللریمی یوموشالدیر ایستی هاوا ؟

آشیق دئییر ترله‌ییب ساز

یوخسا !

ندن سیملریمده اثر قویور سویوق هاوا ؟

                       چالینیرام، كئفیم ناساز

تئللی سازام

سازلیغیمدا یئتمیش ایكی هاوام واردیر

سئوگیلی‌یم

                    سئوگی‌یم من

قولوم واردیر، آغام واردیر

بیر آشیق وار ائللر اوچون چالیر منی

         آشیق‌دا وار غم ایچینه سالیر منی

                    بیر آشیق وار حقیقتدن صوحبت آچیر

سؤزون ائلدن ائله یاییر

آشیق‌دا وار، یالنیز چؤره‌ك خاطیرینه ساتیر منی

هر "هاوا" نین اؤز پرده‌سی، اؤز آهنگی

هر نغمه‌نین اؤز مزه‌‌سی، اؤز سَهَنگی

چاناغیما دالین داییر.

  سازلیغیمدا

اَنگین اَنگین دونیالارا یئر وئرمیشم تئللریمین آراسیندا

دینله منی !

دینله منی ! گؤر سئودیگین سئوگیلینی گیزله‌تمیشم هاراسیندا !؟

اوره‌یینین قاپیسینی آچ تاغ با تاغ ؛ گلیم قوناق

گول بوروموش باغلار كیمی

دولای‌لاری ، جیغیرلاری

لالا بیتمیش داغلار كیمی

اولدوزلارلا آیلارلا من

لام لام آخان چایلارلا من

یا ایسته‌سن

"دبیل جنگی" هاواسیلا آت بئلینده قیلینج چالیم

پاشا قیریم، خان اؤلدوروم

                                        هارای چكیم ، قیصاص آلیم.

آچ قاپینی گلیم قوناق

پیچیلدایان بیر مئی كیمی آستانادان سوزه سوزه

یا دا دئسن دنیز اولوم، لپه‌لرین دوزه دوزه.

آچ قاپینی گلیم قوناق، اورمانلاردان صوحبت آچیم

گونش اولوم؛ جان قیزدیریم؛ اوره‌یینه ایشیق ساچیم

آچ قاپینی گلیم قوناق؛ اتك اتك سؤز گتیریم

سؤزلریمده سود گتیریم، سو گتیریم، كؤز گتیریم

آچ قاپینی سن تاغ با تاغ گلیم قوناق

باغ بزه‌ین یازلارلا من

آچ قاپینی گلیم قوناق آشیق‌لارلا

                                                    سازلارلا من.

آچیقلامالار:

1- شامان: كئچمیش زامانلاردا آشیغا وئریلن آد.       

2 -  قوپوز: كئچمیشده سازا وئریلن آد.

3- باخشی: كئچمیشده آشیغا وئریلن آد.     

4- وارساق: خالق شاعیری، كئچمیشده آشیغا وئریلن آد.

5- اوزان: ائل شاعیری، آشیق.   

6- تئللی: آشیق دیلقمین وفاسیز سئوگیلیسی   

7- گولگز: آشیق توفارقانلی‌نین سئوگیلیسی.

7- جیغامیش: ایران‌دا شوشو داغینین اتگینده اولان قدیم آزربایجان شهرین آدی‌دیر. اورادا آپاریلان قازینتیلارین نتیجه‌سینده بیر پارا ساخسی قابلار تاپیلیب‌دیر كی اونلارین اوزه‌رینده آشیق و ساز شكیلی واردیر، اَلده اولان معلوماتا گؤره میللاددان 6 – مین ایل قاباغا آییددیر.

 7-  قوربانی: 16 – اینجی عصرده یاشایان گونئی آزربایجان آشیغلاریندان بنوشه عونوانیندا قوشماسی آدلی‌دیر.

9- چئشید: جور، نووع، موختلیف.    

10- اوستا داداش: اورومو ماحالیندا یاشایان یاخشی و قابیل ساز باغلایان اوستاایمیش.

11- چیلله: باغیرساق، یایین (كمانین) چیلله‌سی.   

12- اوستا ایشو: اورمو مالانیندا یاشایان باجاریقلی ساز باغلایان اوستاایمیش.

13- سَهَنگ: ساخسی گویوم، بارداق. 

14 -  قولاغ: آشیق، سیملی چالغی آلت‌لرده سیم ساریلان قولاقجیق.

15- انگین: گئنیش. 

16- لام – لام: لال، سس‌سیز.  

 17- لپه: دالغا، شپه. 

 18-  اورمان: جنگل.

 

گؤنده ر     بؤلوم لر: قوشوق (شعر)