بیر یابان فیكیره بویلو اولموشدوم

گبه قارینی كیمی، یوكسه‌لمیش باشیم

شو 8 متیرلیك دوستاقدا

بئینیم بولاندی

و آنلادیم كی معصوم قافام اَللره دوشموش

یئریكله‌دیم !

داغا، داشا، قوشا، دوغویا، اوزوم سویونا – دنیزه

یئریكله‌دیم !

حیالی یاناقلاری سحرده اؤپمك

نه آنلاشیلماز حالیمیش یئریك

و بو حالی آنلاماق

آنجاق!

بوردا هئچ بیریسی یوخدور! یوخ!

دمیردن قاپی پنجره‌لر

دووارلار سویوخ

باشقاسی یوخ

بیلمیرم به‌به‌م شعیر !؟ یوخسا دستاندیر !؟

بیر آجی خاطیره؛ آتالار سؤزو؛ یوخسا بیر اؤیكو !؟

مریم كیمی حیالی فیكیریم نئجه بویلانمیش !؟ بیلمه‌دیم !

آنلادیم كی بئینیم اَللره دوشموش

بو اَلدن او اَله؛ او اَلدن بو اَله

او آجی گئجه‌ده؛ حیاسیز ، شرفسیز

هر شئی قالابالیق

حاسیز گؤزلره، شرفسیز فیكیرلره

و قالابالیق دوشونجه‌لره

آییلدیم، اؤزوم اؤزومه گلدیم

اؤزومله ساواشاركن؛ گئجه‌نی دوشوندم؛ دوزونه گلدیم

سوچومو سیلمه‌ك ایسته‌دیگیم آندا

یئیرتدیم؛ آرالادیم و آچدیم كلله‌می

او حارام باغلامیش فیكیر به‌به‌یی

سالدیم، سالدیردیم

قان قوسماغیمدان بونو بیلدیم

باغلامیش قان، كؤپوكسوز قان

بیر ساری سولو جمدك؛ دوغولدو فیكیریم

قارامتیل، سوی‌سوز، آتاسیز

آچار سؤزلر : یازی,

گؤنده ر     بؤلوم لر: قوشوق (شعر)