بؤلوم: خاطیره

قونو: تمبل اوشاق اؤدول آلدی

بئشینجی صینیفده جاواد آدلی بیر اوغلانلا یولداشیدیم. رحیم كیزیجی اوشاق‌ایدی. یاخشی درس‌ اوخویا بیلمیردی. اوسته گل بیر پیس دادانجی‌دا واریدی. او اؤز قاباغینی ساخلایا بیلمه‌زدی و یئرینه ایشییه‌ردی. آراسیرا كیلاس‌دا دا هر دن اؤزونو ایسلاداردی. بونا گؤره آناسی كیفینده قلم كیتابدان سووای بیر شورت و بیر تمیز شالوار دا قویاردی. نئچه كره كیلاس‌دا یئرینی ایسلاتمیشدی و بوتون اوشاقلاری گؤرموشدوم كی اونو لاغ ائدیب و گولردیلر. اوشاقلاریدا كی تانییریسینیز دووارین جیریغینا گولنلر گؤر بو اوشاغا نه ائدردیلر!؟

آنجاق جاوادلا من یولداش اولموشدوم و درسلرینی یاخشی اؤرگنمك اوچون بیزیم ائوه چوخ گلردی. قورخوسوندان تئز تئز آیاق یولونا گئدردی. چوخ آغلاردی و اؤزونو یاخشی آدام بیلمیردی. بونلارا باخمایاراق مهریبان و سئویملی آدام‌ایدی. اؤزو دئدیگینه گؤره دوكتورلار، دوعا یازانلار، توركه داواچی‌لاردا اونون بو آغریسینا چاره قیلانمامیشدیلار.

منله دردلشردی. دییردی كی بو بئش ایلده كی اوخولا گئدیر بو یئنی اوخول آلتینجی اوخول‌دور آدینی یازدیریپدیر و هئچ مدرسه اونون بو دورومونو دؤزه بلیمه‌دیگینه گؤره ائله بیر ایل اونو كئچیندیریر و ایلین سونون‌دا اونو مدرسه‌دن چیخاردیرلار. آتاسی اونا بئشی اوخویوب سونرا اؤز یانیمدا گلیب ایشلی‌یرسن دئمیشدی. جاوادا اوره‌گیم یاناردی. نئجه اولور كی بئله میهریبان اینسانا بو قدر ظولم اولسون. بو نه ایشدی!؟

بیرنیجی سیناولار توكندی. منیم نومرلریم یاخشی اولدو و اوچونجو یئری كیلاس‌دا آلدیم. جاوادین‌دا كارنامه‌سینده اورتا نومره‌لر یئرلشمیشدی. آنجاق او چوخ سئوینیردی. دییردی كی بو بئش ایلده ایك دفعه‌دیر كی اون‌دان چوخ نومره آلیبدی و هئچ درس‌ده تجدید اولمویوبدور. او مندن چوخ تشكور ائتدی و منیم یاردیملاریما گؤره بو یاخشی نوموره‌لری آلمیشام سؤیله‌دی. دئدی كی آتام و آنا‌دا سندن تشكور ائئدیرلر.

جاواد سئوینجی‌نی منله پایلاشدی و منه ایلك اولاراق اینسانلارا یاردیم ائتمه‌یین دادینی دادیزدیردی. یئنی و تانینماز دویقولاری دنه‌له‌ییردیم. آنجاق بیلیردیم كی جاواد چوخ هوشلو باشلی و اوسلو اوشاقدی و حیف‌دی بو اینسانین سونونجو ایلیدیر كی اوخولا گلسین.

بیر گون صف باشیندا ناظیم دئدی كی یارین هر صینیفین یاخشی درس اوخویانلارینا اؤدول وئریله‌جكدیر. سئونیردیم كی منی‌ده چاغیریپ و اوشاقلارین گؤزلرینین قاباغیندا منی اؤدول‌لـه‌ندیرجكلر. ائویمیزده هامی سئوینیردیلر و من غورورلا دولویدوم.

یارین هامی صف‌ده‌ایدیك. قورآن اوخوندو و میللی هیم‌دن سونرا مودور گلیپ دانیشدی. چوخلو یاخشی سؤزلر دانیشان‌دان سونرا ایكی نفردن ایسته‌دی اوسته گئتسینلر. مودورون دوردوغو یئرده بیر ماسانین اوستونده بیر گولدان ایچینه قیرمیزی ایسه ساری گوللر قویولموشدور. ایكی نفردن ایسته‌دی كی مودورون اوتاقیندان اؤدول‌لری گتیریب و ماسانین اوستونه قویسونلار. اوشاقلار گئدیب و اؤدول‌لری گتیرینجه اوچ اؤیرتمن‌ده مودورا قوشولدولار.

هر شیء حاضیریدی و من باشقا اوشاقلار كیمی دؤزومسوز اولموشدوم. مودور تك تك آدلاری چاغیریردی. آدلاری چاغیریلانلار اوسته چیخیب اؤرگتمن لرله ال وئریریپ اؤدولونو آلیب و اؤز یئرینه قاییدیردی. من‌ده چاغیریلدیم. اللریمین ایچی ترله‌میشدی. اللریمی بیربیرینه سورتوب و اوتقوندوم. اوسته چیخدیم و اؤیرتمنلرین گولر اوزلرینه باخاراق اونلارلا ال وئردیم. گؤی كاغاذلا ساریلمیش گؤزل اؤدولومو آلدیم و اوشاقلارین آلقیشی سانكی دونیا منی آلقیشلاییر دویدوم. اوشاقلار ساری دولاندیم و چپیك چالانلارین ایچینده گؤزوم جاوادا دوشدو كی دوغرودان بوسبوتون دویغولاریلا منه چپیك چالیردی. سایقی اولاراق باشیمی اونلارا اگدیم و پیلله‌لردن آشاغی دوشدوم. من چوخلو بئله اؤدول‌لر آلمیشدیم آنجاق نظریمه بو كره تام فرقلی ایدی. هامی اؤدوللرینی آلدی. آنجاق بیر فوتبال توپو قالمیشدی. یئنی‌دن مودور دانیشماغا باشلادی. هامی‌یا اوغور دیله‌دی و توپون اوستونه ال قویاراق آرتدی: ایندی بیر باشقا اؤرگنجی‌ده وار كی بو اؤدولو اونون اؤزل چخارینا گؤره وئره‌جه‌ییك! جاواد رحیمی!

دوغرودان هامیمیز شاشیردیق. اؤرگتمن‌لر گولومسه‌ملرینی گیزله‌ده بیلمه‌دیلر.  دوز ائشیتدیك‌می!؟ من جاوادا و جاواد منه و هامی جاوادا باخیردی. جاواد اینانمیردی. بیر داها مودور جاوادی چاغیردی و جاوادین دیزلری تیتریه‌تیترییه پیله‌لردن اوسته چیخدی. مودور توپو اونا وئردی و سول الینی اونون باشینا چكرك سؤیله‌دی:

" بو اوشاق چوخلو چیخارلی اوشاقدی. او دونیادا ایشه‌مك‌ده رئكوردو سیندیریپدیر و نئچه یول‌دا كیلاس‌دا گؤل‌له‌ییپدیر."

مدرسه‌نین دووارلاری‌دا پارتلادی. گولمكدن قارین باغیرساقلارینی توتموشدولار اوشاقلار. بعض اؤرگتمنلرین گؤزلری یاشاردی و انگ‌لرینی اووكه‌له‌ییردیلر. جاوادین ال آباغی اسمه‌یه دوشدو و قوروموشدو. توپ الیندن قوتولوب و آشاغی دوشدو. جاوادین گؤزلرینده دنیز دالغالانیردی آنجاق ائشیگه سوزموردو. مودور اؤزونو ییغیشدیریپ و هامیا سوسون سؤیله‌دی. آنجاق بو اولاسی دگیل‌ایدی. جاوادین آریق و چوروك بونوندان وورودو و اونا دئدی قاییت اؤز یئرینه. چالیشیردیم جاوادین حالینی منیمسه‌یم. جاواد پیلله‌لردن دوشرك منه باخدی. دوشوندوم باخیردی كی من گولورم یوخسا یوخ. آنجاق من هئچ زامان گومه‌دیم و چوخ‌دا اینجیدیم. جاواد پیلله‌لردن دوشدو آنجاق اوشاقلارین باخیشلارینین آغیرلیغینی گؤروپ یئل كیمی مدرسه‌نین ایشیك قاپیسینا ساری گؤتورولدو. نئچه ثانیه‌ چكمه‌دی و جاواد گؤرونمز اولدو. او گوندن بری داها جاوادی گؤرمه‌دیك. جاوادین كیفی منده قالمیشدی و مودور توپو گؤتوروب منه وئردی. اوشاقلار بیر داها گولدولر. مودور اونلاری قارسیلادی. منه دئدی بیلیرم كی سن و جاواد بیربیرنیزله چوخ تانیشسینیز. ائوه گئدنده جاوادین توپو و كیفینی بیله‌سینه آپار وئر. دئدیم گؤز اوستونه.

او گون كیلاس‌دا اؤزوم‌ده دگیلیدیم. مدرسه‌دن قوتولدوم و ائوه ساری یوللاندیم. ائویمیزین یولوندا جاواد گیلین قاپیسینا گئتدیم. آناسی قاپینی آچیب و جاوادین كیفی و توپونو وئردیم. آناسی مندن سوروشدو: نه اولوب كی جاواد مدرسه‌دن قاچیبدیر!؟ نه قدر دئدیم مدرسه‌یه قاییتمادی.

بیلمیردیم نه دئییم. چیگینلریمی آتدیم و خداحافیظ لشیپ ائویمیزه ساری دؤندوم. من او گون بیر اینسانین تحقیر اولماغینی اؤز گؤزومله گؤردوم.

*****

سؤزلوك

اؤدول = جاییزه

كیزیجی = گؤشه‌گیر - منزوی

دادانج = عادت

لاغ = مسخره - استهزا

سیناو = ایمتیحان

 دنه‌لمك = ایمتیحان ائتمك - تجروبه ائتمك

اوسلو = هوشلو - عاغیللی

میللی هیم = میللی سرود

چپیك = تشویق - آلقیش

انگ = فك

چیگین = شانه - دوش

آچار سؤزلر : اوشاق,

گؤنده ر     بؤلوم لر: اؤیكو (حكایت)