قادینلار موباریزه سیمگه‌سی (1)

آزادلیق اوجوز مال دگیل آلیپ بیرینه پای وئره‌سن. آزادلیق قان تر باهاسینا؛ جان باهاسینا آلینار؛ وئریلمز؛ داها دوغروسو وئرمزلر آزادلیقی. آزادلیقی قارا قویولار ایچینده گیزله‌دیرلر آزادلیق یییه‌نلر. البت! واردیلار آزادلیقی یی‌ییب دیری‌ قالانلار. هابئله آزادلیقی اوغرویانلاردان آزادلیقی آلسانسا اونلار اؤلرلر. بیلمیرم آزادلیقی بئله تانیملاساق (2) او آزینلیق‌دا قالار یوخسا ائله آزینلیق‌دیر (3) آزادلیق. بلكی‌ده آزادلیقی اؤره‌تمك‌ده (4) اولور! اؤره‌تیلمیش آزادلیق!

بونو نئجه ائتمك اولار!؟ دئمك بونو بیز نئجه ائده بیله‌ریك!؟؛ دوغرودان بئله‌نجی بیر ایشی گؤرسه‌ك بیز ایلك (5) اولوس (6) ساییلاریق كی " آزادلیق اؤره‌تیجی‌سی" اولوروق دونیادا.

قادین و اونون آزادلیق یولوندا اوینامی (7)

بیر قادین ان آزی دؤرد كیشی‌یه ائتگی‌سی (8) وار.

1-   آتاسی

2-   قارداشی

3-   اری

4-   ائولادی

بوندان نه دئمك ایستییرم!؟

تاریخی اولایلارین اونایلارینا (9) گؤره، هر زامان بر میللت یوخسا بیر توپلومون موباریزه‌سینده قادین عونصورو گیریپدیر؛ بؤیوك موعجیزه‌لرین تانیغی (10) اولموشوق. او موباریزه‌نین اون‌قات گوجونون آرتماسی‌ بلیرله‌نیپدیر (12). بونا چوخلو اورونلار و ندنلر سایا بیلریك:

1-   ائولی كیشیلرین (ار) هر زامان موباریزه‌یه  قاتیلماماقلارینین بؤیوك ندنینی " آییله‌م منه ایحتیاجی وار" سؤیله‌ییرلر. آنجاق بیر زامان كی قادین یوخسا آییله‌سی موباریزه‌یه قول قویورلار بو مانیع آرادان گؤتورولور و اولوملو (12) بیر انرژی كیشی‌ ایسه قادینا سئزیلیر (13) و آتلاشدیریچی (14) عامیل اولور قادین قاتیمچیلیقی (15).

2-   پئسیخولوژی (16) باخیمیندان آتا اركلی (17) توپلومدا هر زامان كیشی اؤزونو قادیندان اوستون بیلیر؛ اونو گوجسوز (ضعیفه) آدلانیرماقلا قادینلارا گوونجی (18) اولا بیلمه‌ییپدیر. بونا گؤره هر زامان بئله‌نجی كیشی‌لر بیر موباریز قادینلا اوزله‌شیبدیرلر؛ دامارلاری شیشیب و چالیشیپدیرلار تعادل یاراتسینلار. بو بیر رقابت یارادیر.

3-   یوخاریدا دئدیگیم كیمی بیر موباریز قادین 4 كیشی‌یه ائتگی‌سی وار و بو دؤرد كیشی موباریزه‌یه قاتیلماسا بئله، او قادیندان موحافیظت ائتمك نیتینه‌ده اولسا؛ قادینی حیمایت ائدیرلر.

4-   قادین دوغان‌دیر. اوشاقلارینی دوغور و اؤز فیكری‌ایله بئجه‌ریر. بو اوشاقلار گله‌جه‌گین موباریزلری اولارلار. ائله‌جه قادینین دوغان اؤزونلویونه (19) دایاناراق، قادین یارادان بیلیم، فلسفه و ... كیشی‌لر وریسیندن‌ده (20) چوخ آلقیشلانیر و چوخ یانداش (21) تاپیر.

منجه آزربایجانیمزین گله‌جه‌یینی قادینلارلا پایلاشساق هئچ‌ده یارارسیز اولماز. بلكی‌ده میللی حركتیمیزین اؤنجولو (22) بیر قادین‌دیر!؟

****

(1) سیمگه Simgə = نماد

(2) تانیملاساق = تعریف ائتسك

(3) آزینلیق Azınlıq = اقلیت – محدود

(4) اؤره‌تمك Örətmək = تولید ائتمك

(5) ایلك = ابتدا – اوول‌ینجی

(6) اولوس Ulus = مییللت – خلق

(7) اوینام Oynam = نقش – رل

(8) ائتگی = تاثیر مثبت

(9) اونایلاری Onayları = مصداق‌لاری (اونایلاماق چیخاقیندان)

(10) تانیق = شاهید – گؤرموشوك

(11) بلیرله‌نمك = آشكار اولماق

(12) اولوملو = مثبت

(13) سئزیلیر = تزریق اولونور

(14) آتلاشدیریجی = محرك – دبردیچی Dəbərdiçi

(15) قاتیمچیلیق = ایشتیراك

(16) یئسیخولوژی = روانی – روانشناسانه

(17) آتا اركیل = پدر سالارانه - آتامانلیق

(18) گوونج Güvənc = اعتماد – آرخالانماق

(19) اؤزونلوگونه = مشخصه

(20) وریسیندن = طرفیندن – ساریسیندان

(21) یانداش = همراه – طرفدار

(22) اؤنجول Öncül = لیدر

گؤنده ر     بؤلوم لر: توپلومسال (اجتماعی)