سیلیك (1)

بیر آن اؤزونه گلدی. دووارا آسلانمیش ساحاتا باخیب دوشوندو یاریم ساحاتا یاخین‌ایمیش گؤزلری اؤنونده‌كی دوورا سونراسیز (2) نسنه‌یه (3) تیكیلمیش‌میش. آلنیندا ایسه بوغازینین آلتینداكی سویوق تری (4) سیلدی. یانتئلفونونو او قدر الینده سیخمیشدیر كی دویمه‌لرینین ایزی اووجونون دریسینده قالمیشدیر. دویمه‌لرین ایزینده‌ده عمی‌قیزیسینین تئلفون نومره‌سینی اوخویا بیلیردی. اوشاقلیغلاریندان بیری‌بیرنله بؤیوموشدولر. بیری‌بیرنله اوخولا گئدیردیلر. اوركه‌ن (5) عمی‌قیزیسینا درسلرینین اؤرگه‌نمه‌سینده یاردیمجی اولموشدور. سونرالار عمی‌قیزیسینا سئودالاندیغی‌دا یادینا دوشدو. عمی‌قیزیسینی " آدامی آلدادان جنتین قیرمیزی آلماسی" (6) آدلاندیرمیشدی. گؤزل بیر قیز. عمی‌قیزیسینین هر شی‌ای اونون روحونو تیتره‌دیردی. اودلو بیر سئوگی. آنجاق تام ترسینه عمی‌قیزیسی اونو یاشام یولداشی (7) كیمی قبول ائتمیردی.

یوسوف بوتون شانسلارینی دفعه‌لرله ائلچی گؤنده‌رمكله دنه‌له‌میشدی (8) آنجاق اولمادی و عمی‌قیزیسی " درس اوخویاجاغام دییه " نه یوسفلا و نه باشقا كیمسه‌ایله ائولنمه‌دی. نهایت بیر ساحات اؤنجه سوبای عمی‌قیزیسی سوبای یوسوفا زنگ آچیب یاریم ساحات آجی آنلاری یاشاتدی یوسوفا. 10 ایللیك آجی سئوداسینی اویاتدی.

****

بیر ساحات قاباق

یوسوف اوتاغیندا یانتئل(9)‌ ایله اویناییردی. تئلفونو "یئنی یامجیق (10) گلدی" سسلندی. قوطونو آچیب اینانمازجاسینا اوخودو:

-        سلاملار. شیرینم عمی‌قیزین. سنله دانیشماق ایسته‌ییرم. اولورمو!؟

یوسوف بیر آز دوشونوب و "هن" گؤندردی.

چوخ چكمه‌دن عمی‌قیزیسی زنگ آچدی.

-        سلام شیرین. نئجه‌سن. نئجه زاد اولوب منی خاطیرلامیش‌سان!؟

-        سلام. یوسوف. یاشا یاخشی‌یام. سنله واجیب ایشیم وار!؟ واختین اولسا دانیشاق.

یوسوف سئوینه‌رك سؤیله‌دی:

-        اولسون هارا و هاواخ دئسن گؤروشك یاخیندان دانیشاق.

-        یوخ! بو سؤزوم چوخ آجی سؤزدور و یاخیندان دانیشماقدان هم قورخورام همیده اوتانیرام. واختین اولسا تئلفون آرخاسیندا دئییم.

شیرینین سسی تیتره‌ییردی. یوسوف بو سسی قاباقجان‌دا بئله‌نجی ائشیتمیشدی. سؤیله‌دی:

-        هن. بویور قیز.

بوغازی قوروموش شیرین، آغزینین سویوایله دیل دوداغینی ایسلاتدی و سونرا اوتقوندو. یوسوف هامیسی‌نین سسی‌نی ائشیتدی و دوشوندو كی چوخ اؤنملی‌دیر سئوگیلیسینین سؤزلری. اونا گؤره تئلفونو برك قولاغینا سیخیب بیرده "سؤزونو دئ" سؤیله‌دی و شیرین دانیشدی.

-        یوسوف! هله‌ده منی سئویرسن‌می!؟

-        بونو هامی بیلیر و سنده بیلیرسن كی سنی سئومكدن هئچ زامان پئشمان اولمامیشام و اولمارام.

-        اولدو! یوسوف! سن منیم سئودامدان ائولنمه‌میش‌سن یوخسا باشقا ندنی وارمی!؟

-        آنجاق سنی سئومیشم و سئویرم. نئچه كره بونو سنه سؤیله‌میشم.

یوسوف چالیشیردی سورغولاری قیسسا یانیتلاسین كی عمی‌قیزیسی اؤنملی سؤزونه یئتیشسین. ایلك (11) دفعه‌دیر عمی‌قیزیسی بئله‌نجی سئوگی‌دن دانیشیر و یوسوفون گؤزلری پاریلداییردی. شیرین داوام وئردی:

-        دوغرودان یورولمامیشان منی سئومكدن!؟

-        یوخ! ایندی من سندن بیر سورغوم وار. سن كیمسه‌نی سئویرسن كی ایندی‌یه قدر منه یوخ دئمیشن!؟ آنجاق ندن ایندیه قدر ائوله‌نمه‌دین!؟ بلكی منده اؤز یاشامیمین یولونو دگیشه‌ایدیم! سن نه اؤزون ائوله‌ندین و نه منه هه دئدین!؟ بونون ندنی ندیر!؟

ائله بیل شیرینین باشینا داغ سویو تؤكدولر. آغلاماقدان سسی بوغولدو. كسیك كسیك سؤزلری آنلامسیز اولدو:

-        ائ ... له ... هیق هیق ... ب ... و نا ... هیق ... هیق ....

یوسوف سووشدوغو سورغودان پئشمان اولموشدور. یوسوف همیشه‌كی كیمی سئوگی‌سینی دیله گتیرمه‌كده اؤزونو سوچلو گؤردو. چالیشیردی شیرینی ساكین ائتسین.

-        شیرین جان. منی باغیشلا. نه اولدو آخی! واللاهی سندن اینتیقام آلماق اوچون سوروشمادیم. دئدیگیم كیمی سنی سئومكدن پئشمان دگیلم. آنجاق بو منه هر زامان سورغو اولوبدور. ایسته‌سن‌سه یانیتلاما (12). اؤنملی دگیل.

یوسوف چالیشیردی شیرینی اووندورسون.(13) بیر آز دان سونرا شیرین دینج (14) اولدو.

-        یوسوف باغیشلا. اینجیتدیم سنی.

-        اولسون. سؤزلرینی قوی قالسین باشقا زامانا. ندن ایسته‌میرسن گؤروشك!؟ بوش وئر بو سؤزلری. ایسته‌میرم سنی آغلار گؤروم.

-        یوخ! باشقا واختیم یوخدور. سندن بیر سورغوم وار!؟ بونو دوغرو دوزگون یانتیلامالی‌سان!؟ بویوردون منی ایندی‌ده سئویرسن.

-        هن!

-        تامام. منله ائولنمه‌ك ایسته‌ییرسن‌می!؟

-        هن. بو منیم ان بؤیوك دیله‌ییمدیر (15).

-        یوخ! بیر آز دؤز! قوی سؤزومو بوتونلوكله قورتاریم. سونرا دوشون و منه جاواب وئر!

-        اولدو

-        سنه دئسم من سیلیك دگیلم حاضیرسان منله ائوله‌نه‌سن!؟

-        نه‌ ... مه‌  .... نه!؟

-        یعنی من قیز دگیلم.

****

یوسوف یاریم ساحات بوندان قاباق قوروموشدو.شیرین ائله شوك ائدیریجی بیر سؤز دئدی كی داها اونا جاواب وئرمه‌میشدی. بیر آزدان شیرین تئلفونو كسمیشدی.

باشیندا فیرتینالار اسیردی. چوخلو فیكیرلره دالمیشدی. شیرینین بو سؤزلری دوغرودور یوخسا یانلیش دوشونوردو!؟ بلكی‌ده منی سئوگیمدن سویوتسون دییه بونلاری سؤیله‌دی!‌

اؤزو اؤزونله یاخا به یاخا (16) اولموشدور! سئوگی‌ ندیر!؟ اونون سیلیك اولماغی یوخسا اولماماغی سئوگیمده نه ائتگی‌سی (17) وارمی!؟

بلكی‌ده شیرین فاحیشه‌دیر!؟ فاحیشه‌نی اؤلدورمك لازیمدیر؟ یوخ! بیری بو كی او اصلن قیزقین (18) دگیلیدی و ایكینجی‌سی اونو من سئویرم. من اونا گؤره بو قدر دؤزموشم.

سؤزلوك و اتك یازیسی

1 – سیلیك Silik = باكره

2- سونراسیز Sonrasız= ابدی – بی‌نهایت

3- نسنه Nəsnə = شیء – چیز

4- تر Tər = عرق

5- اوركه‌ن Ürkən = همیشه

6- استعاره از سیب سرخی كه حضرت آدم را فریفت و از بهشت راند.

7- یاشام یولداش Yaşam yoldaş = حایات یولداش Hayat yoldaş = همسر

8- دنه‌له‌مه‌ك Dənələmək  = امتحان كردن – آزمودن

9- یانتئل Yantel = تلفن همراه

10- یامجیق Yamcıq = پیام – مئساژ

11- ایلك İlk = اول – ابتدا

12- یانیتلاما Yanıtlama = جاواب وئرمه‌ك – پاسخ دادن

13- اوونماق Oğunmaq (ovunmaq) = آغلاماقدان واز گئچیندیرسین.

14- دینج Dinc = آرام – ساكین

15 – دیله‌ك Dilək  = آرزو – ایستك – خواهیش

16 – یاخا به یاخا = دست به گریبان

17- ائتگی Etgi = تاثیر

18- قیزقین Qızqın = حشری - افراطی

گؤنده ر     بؤلوم لر: اؤیكو (حكایت)