زامان سورسینده شهیت‌لریمیز

زامان بیزی آلداداراق؛ سانكی سولیمان خالچاسی كیمی؛ یوخسا ملك قانادلاریندا یوموشاغجاسینا، یاواش- یاواش و داها یاواش؛ گؤتوروب بو گونلره آتمیشدیر.

زامان بیزی گؤتوردو و شهیدلریمیز قالدیلار. بیز گلدیك آنجاق اونلار گلمه‌دیلر بو گونه. اونلار قالدیلار او گونده؛ هارایلاری زامانلاری سوكوب گئچیر و گئدیرلر. اونلاری اؤلن دوشونوركن "هارایلاری" اؤلمز گؤرونورلر. سولوغانلاری (شوعارلاری) ائشیتمز اینسانلارین قولاغلارینی ییرتدی و بیزیم هارایمیز بوغازیمیزدا اؤزوموزو یاندیریر و پارتلاماسالارسا؛ بیزی ییرتیجی كیمی پارام پارچا ائده بیلیرلر.

شهیدلریمیزین سسلرینی دوی (حس ائیله) . ایندی‌ده داوامی وار و زامان اَلَكیندن و سوزكئچیندن اله‌نرك و سوزوله‌رك؛ بیر سس داها اونلارا یامالیبدیر. او سس "داوام ائدین" بیزی چاغیریر. "داوامچیلار هارداسینیز!؟ یولونوز آچیقدیر. ..."

بیزی زامان یارپاق میثالی بورویوب سارمیش و شهیدلریمیز اؤزگورلوكلری‌یله (آزادلیغلاری‌ایله) زامانی بورویوب سارمیشلاردی.

زامان لای لایی! اویدورما بیزی! آلداتما بیزی! قورخوتما بیزی! چونكو بیز شهیدلریمیزه اوغورلار دیله‌دیك و اونلار بیرلییمیز اوغروندا، اوغور قازاندیلار. ایندی اونلار بیزه اوغورلار دیله‌ییر. دوی سسینی.

گؤزلرینی یوم. بو سن سن و بو یولوموز. زامانلاری آل اَلینه! كئچمیشینی، ایندینی و گله‌جه‌یی دوغرو دوشون. اونلار سنین اَلینده بیر اویونجاقدیلار. ساده‌جه زامان كئچیب؛ گؤز یومدوغون آن و گؤز آچدیغین آن. گوندوز و گئجه‌لر چورتكه‌سینده اؤلچولن زامان.

بیز واریق. شهیت‌لریمیز وار. ایستك وار. یول وار. نه ایستیریك داواما تانری یولوندا؛ وطن اوغروندا !؟

بیر دوغرو بلكه آجی سؤز دئمه‌ك ایسته‌ییرم. بیز ترپه‌نمسك بیز چالیشماساق؛ اوله‌جه‌ییك. آنجاق ناسیل اؤله‌جه‌ییك. سئچیم اؤز اَلیمیزده.

آغ ایپك دسمال ایله آل قانلاری سیلینمیش؛ او بیزیم آندیازیمیز اولوب. او آل بایراغا آند ایچ. نه آند ایچیرسن ایچ.

من اونلارین آندلاریندان یئره داملامادان؛ قوروموش قیرمیزی قانلارینا آند ایچیرم.

من اؤزوم شهیدلرین ماوی گؤیه باخان آچیق گؤزلرینه آند ایچیرم.

من اونلارین آددیملارینین ایزینده گویه‌رمیش یام‌یاشیل بیتگی‌لره آند ایچیرم.

آند ایچیرم زامانا آلدانمایام، سارسیلمایام و یورولمویام. شهیدلریمیز بیزی گؤزلویورلر. بیزدن قاباغ بیزی گؤزلویورلر.

گؤنده ر     بؤلوم لر: اؤته‌ك (تاریخ)