یاشاماق بیر سئوینج‌دیر آغلاماقلا باشلانیر قارین دونیاسیندا قووشان ایكی نارین سئودالی توخوملا. من سن اولوشوروق.

خاطیرلامیریق آتا و آنامیزین قیزقین حاللارینی؛ داغ اؤپوشمه‌لرینی؛ سئویشمه‌لرینی بیزی یاراتماغا چابالارینی. بلكی‌ده انوتموشوق. خاطیرلامیریق تانرینین پیچیلتی‌سینی ایلك آنلاریمیزدا : " من سنیین یارادانینام. اینانیرسان‌می منه!؟" گئنه‌ده بلكی اونوتموشوق.

قارین دونیاسی اولایلارینی اونوتموشام! نه اولدو!؟ نئجه اولدو!؟ منی بو آچونا باغلایان آنامین قارنیندا بیر گؤبك باغیرساقی! نئجه‌ده برك یاپیشمیشدیق قارین دونیاسینا. اوندان آیریلماقی اؤلوم سانیردیق بلكی! اونوتموشوق ! بیلمیرم.

قارین دونیاسیندا اؤلدوك و قویلاندیق. اونوتموشوق نئجه آچیلدی یئنی بیر دونیا! و گؤبك كسیلدی. آغلاماغیمیزی‌دا اونوتموشوق. یئنی بیر یاشام سوره‌جی. بئله‌كی گؤرونور یاشام آشامالاردان تؤره‌نیپدیر.

كؤرپه‌لیگیمیزی، اوشاقلیغیمیزی، آغلاماغیمیزی، دیل آچماغیمیزی، سود اممه‌گیمیزی اونوتموشوق. ائله بیل نه قدر ایره‌لی گئدیریك بیر قارانلیق آرخامیزجا گلیر؛ بیر سیلگی سیلیر بیزدن قالان ایزلری.

یاشام نئجه قریبه‌دیر!

بیر گونوموزدن شابلون یاراتمیشیق و كوپی ائدیریك یارپاق یارپاق یاشام دفتریمیزده. گونده‌لیك لر اوف ف ... ! بونا دا یاشامیمیزین آدلاندیریریق. بیر گون كوپیاسی. چوخ‌دا گولمه‌لیدیر! نه بیلیم بلكی‌ده آغلامالی‌دیر.

آنجاق هر یارپاغا بیر بویا سپیریك اونوداق دونه‌نی م ی ز ی ... . اونوداق كئچمیشیمیزی. اونوداق آجیلاریمیزی، سئوینج‌لریمیزی و هر نه‌ییمیزی و هابئله یاشانتی‌لاریمیزی.

كسگین دئمك اولمور بو دونیامیزا باغلایان بیر گؤبك وارسا- قارین دونیاسینین گؤبك باغیرساقی كیمی - اوندا یئنی بیر دونیادا دوغولاجاییق‌می!؟ یاشام سنه گولمه‌گیم گلیر. هله‌لیك سن سن منی آلدادیرسان اونوتقانلیقلاریملا.

آردی وار- ادامه مطلب


گؤنده ر     بؤلوم لر: گؤركسؤز (ادبیات)